تشطيب شقة باسعار 2013

 

السلام عليكم و رحمة الله و بركاته

 

بسم الله الرحمن الرحيم

 

أمبارح كان فيه موضوع بتستفسر فيه عن سعر تكلفه شقة طبعا السؤال ده أنا دوخت فيه قبل ما نبتدى نوضب

و الحمد لله بعد البحث و نزول المحلات و السؤال و الاتصال بالناس والعماله و بحث و تدقيق لمده 4 شهور قبل بدأ التوضيب

نتوكل على الله و نبتدى شرح كل حاجه بالتفصيل الممل بالأسعار و التكلفه و أماكن البيع ملحوظة الأسعار أسعار شهر 2 / 2013

دلوقتى توضيب اى شقه أول أساس بتفكرى فيه أول حاجه لازم تتعمل

الكهربا و السباكة

نبتدى بالكهربا . بسم الله

مبدائيا مصنعية الكهربا 1500 جنيه

دى مصنعية الكهربائى طيب الكهربا طبعا لو واخده شقه على المحارة بيكون ماشي فيها مواسير بس فاضيه الكهربائى بيشد فيها السلك بس

لكن أول نصيحه حتى لو واخداها على المحارة كسرلى و اظبطى الكهربا صح و المحارة هاترجع تظبط مكانها بأقل من 500 جنيه

السؤال بقى أيه هى الكهربا الصح

مشى كل سلك هايمشى فى الشقه فى ماسورة لوحده لأن بعد الشر لو سلك باظ أخرك هاتشديه و تركبى بداله لكن لو كل الأسلاك فى ماسورة واحده هاتبقى مكلكعه و لو سلك باظ كسرى فى الحيطة ياحلوة علشان تطلعيه

طيب دلوقتى انتى مش عايزه وجع دماغ و مصاريفك على قدك و هاتمشى أسلاك بس علشان توفرى فلوس يبقى سيبك من الموضوع ده مشى أسلاكك و خلاص

نييجى بقى لأحتياجات الكهربا . الكهربا هاتحتاج أسلاك كهربا و أسلاك تليفون و بالنسبة لى انا حطيت أسلاك وصلات الدش و التكيف جوه الحيطة علشان ماتمشيشي فى الشقه

و حددى أماكن النجف و الأضاءة و أماكن الفيش ودى بقى حلاوة انك تكسرى و تعمل كهربا على مزاجك لأنك هاتحددى أماكن الفيش و توضبيها صح

أنا شقتى 120 متر . 90 صافى*

جيبنا حاجات ب 2000 جنيه مابين أسلاك ومواسير

ملحوظة أنا جايبه اسلاك تكيفيين و أسلاك دش لكل الغرف فا اللى معنهدومش تكييف هايبقى السعر ناقص 500 جنيه على الأقل لأن أغلى سلك هو سلك التكييف

المواسير رخيصه أوى

المهم اول حاجه لازم يعملها يوصل كهربا الشقه و يشغل لمبه فى كل أوضه و حمام علشان الناس اللى هاتيجى توضب تلاقى نور تشتغل فيه

دى الأسعار من الفاتورة معايا فى أيدى:

- لفة سلك معزول أنارة 2 مم جايب عدد 4 لفة سعر اللفه ب 130 جنيه

- لفه سلك تليفون سعرها 25 جنيه

- بريزه العدد 5 سعر الواحده 3 جنيه

- لفه 4 مم معزول تكييف + غسالة العدد 2 لفة سعر الواحده   185

- سلك عداد 16 مم معزول العدد 4 سعر السلك للواحد 15 جنيه

- مفتاح اتوماتيك العدد 2 سعر المفتاح 12 جنيه

- علبه ماجيك فئة 1.50 عدد 40 واحده

- لفة خرطوم علاء الدبن 16 م العدد 4 سعر الخرطوم 70 جنيه

- لفه ستون 16 م العدد 2 سعر الواحده 12 جنيه

- لفة ستون 13 م العدد 4 سعر الواحده 10 جنيه

- مفتاح فاز 45 جنيه و العدد 4

- دوايه عدد 5 سعر الواحده 2 جنيه

- لمبة 100 واط سعر الواحده 3 جنيه العدد 5

- اللمبة و الدوايه دى علشان ينور الشقه فى الأول علشان العمال و التوضيب

المهم مجموع الحاجات دى 2000 جنيه تقريبا على مساحه 90 متر صافى طبعا سلك التكيف غالى لو قل ممكن يقل 500 جنيه و لا حاجه
بس أنتى هاتجيبى نفس السلك للغساله الاطباق و الأتوماتيك دى كده أسعار الكهربا و كل اللى هاتحتاجه الشقه فيها و كل النصايح اللى تخصها
أماكن البيع بقى عندك العتبه و افضل أسلاك هى السويدى لكن خلى بالك علشان فيه منها مضروب بالنسبة لنا الكهربائى عنده محل كهربا طلعلنا منه بسعر العتبه تمام
و الزياده بيرجعها المحل فا بالتالى مابنتدبسش فى أسلاك زياده و لا مواسير زياده كله بيرجع

---------------------------------------------------------------------------------------------------

السباكة

 

 

مصنعية السباك على حمامين و مطبخ 1700 جنيه

خلو بالكم أهم حاجه السباكة دورى دورى دورى على سباك شاطر ماتسترخصيش فى السباك أبدا لان السباكة لو وحشة هاتدمرلك البيت
نيجى بقى لطلبات السباكة المطلوب تشتريها دلوقتى السوق فيه أتنين عندك الشريف ده مصرى و الناس بتشكر فيه و عندك الألمانى البى ار ده طبعا لا مقارنه بيه و لا يعلى عليه الاتنين مواسيرهم معاها ضمان مدى الحياه بس الشريف مواسير لصرف معهاش ضمان طبعا تكلفه مواسير الشريف نص تكلفة المواسير الألمانى أنا طبعا وسواسه و جيبت الألمانى
الفاتورة الصراحه 3 صفحات هههههههههههه
اللى عايزن تسألى على سعر ماسورة و لا كوع تقولى هاطلعها منها لو كتبتها كلها مش هانخلص

بس عموما السعر الاجمالى  1920جنية لو كنا جيبنا الشريف ماكانتش عدت 1000 جنيه

نييجى بقى علشان تبقى واعيه السباكة ايه اللى بيحصل فيها:

١-  السباك بييجى يعمل المواسير و الصرف

٢-  بتكلمى شركة الشريف أو الشركة اللى واخده توكيل مواسير البى أر الألمانى

٣- بييجو يعملو كبس على المواسير(الكبس ده مهم أوى الشركة بتييجى تحددلك ضغط المايه اللى تستحمله المواسيرعلشان
( لو المايه جت ضغط عالى المواسير تستحمل الخطوة دى مهمة جدا و لو السباك
اسأليه هايشتغل أزاى لو ماقالكيش على الخطوه دى على طول قوليله طيب هاكلمك تاتى و اقفلى و ماتتصليش أخلعى طياره هههههههههههههههه
المهم الشركة بتييجى تبص على شغل السباك و اللحمات و تعمل كبس للمواسير و تظبط الضغط و تأمن على المواسير تمام
و تديكى ورك بتروحى بيه الشركة تاخدى ضمان مدى الحياه طيب لو الشركة كانت جت و لقت لا سمح الله ماسورة مسربه
و لا فيها مشكلة على طول كانت تعلم عليها و تديكى غيرها يركبها السباك دى حلاوة البى أر هو الشريف كده لكن مش على

 الصرف البى أر على الصرف و كل حاجه الشركة بقى تخلص كل القصه دى من غير فلوس

٤- يرجع السباك يركب البنانيوهات و يحط العازل للحمامات و يقفل البانيوهات بالطوب                       

و خلى بالك بعد ما يقفل البانيو حطى تحت أكياس و كرتون

و فوقيه عبى البانيو رمل على الاخر علشان اللى بيركب السيراميك مايحطلكيش سلم فى البانيو يكسر

٥- كده تبقى الشقه الحمد لله تمام خلصنا سباكة و كهربا بكل التفاصيل

أماكن بيع حاجه السباكة السبتية

احنا جايبين من محل هناك أسمه المارينا بلاست

---------------------------------------------------------------------------------------------------

السقف

 

أحنا جيبنا واحد عمل اللى كسره الكهربائى فى المحارة و السقف كله مصيص لمساحه 90 متر صافى و اخد 1000 جنيه

كده تمام لو لسه بقى على الطوب الاحمر و هاتعملى محارة فا المتر المحاره ب 7 جنيه.

 ندخل على اللى بعده كده سباكة و كهربا و مصيص للسقف

حتى لو كنتى على المحاره تشتطيبات الشقق اللى تبع المقاولين دى مابتبقاش حلوة أوى خلى حد ييجى يبص على المحارة علشان ممكن يكون فيها مطبل يهدلك المطبل و يعمل مكانه أحنا عملنا كده

ندخل بقى على الليله الكبيرة  السيرامييييييييييييييييييييييييييييك

---------------------------------------------------------------------------------------------------

السيراميك

 

بصى بقى يا ستى

الاول هانتكلم فى اماكن البيع لانى دوخت السبع دوخات و هاقولكم على كل الاماكن و الأسعار اللى لاقتها فيها
عن السيراميك بتاعى انا شخصيا

أولا بسم الله احنا أختارنا سيراميك باركيه قطع ليزر ده رويال منزلاه جديد

أحنا جيبناه و ركناه قبل ما نعمل الشقه فى شهر 12 و استغلينا عروض 100 سنة سلاب كان السيراميك وقتها فى السلاب 65 جنيه بعد الخصم و فى البطل ده فى عباس العقاد بردوه قريب من السلاب أرخص من السلاب ب 2 جنيه نزلنا بقى الفجاله و الترسته و ما يحاوطها من اماكن هههههههه كان 66 جنيه و مش عايزين ينزلو جنيييييييييييييييييييييييه واحد نهائى طبعا وصلنا معلومة أن فيه أماكن كتير بتضرب الكراتين فرز أول على تانى و اللى يشترى يلبس علشان خارج هههههههههههههههههههههه فا بعدنا عنها اولا لأنها اسطورة فاضيه مش ارخص من بره أبدا ألا لو بتدورى على حاجات صينى و خلافه رجعنا بقى السلاب لانه كان الوحيد اللى عنده الكميه المطلوبة عارفين وقفنا فاصلنا مع المندوب اللى واقف معانا و اخدنا ب 62 جنيه أرخص من كل المحلاب بره أنا بقولكم الأخر و كل شخصيه ليها حريتها و فيه ناس معاها امكانيات تانية طبعا فى النهائى السيراميك على حسب أمكانياتك.

المهم اننا روحنا السلاب من اسبوعين علشان نجيب البانيوهات و طقم الحمام و دى هانرجع لها بعدين

كان سعر السيراميك ده بعد الخصم 120 جنيه لما سألنا أيه اللى حصل و جد طلع علشان دى الأسعار بعد الضرايب الجديده و دى لسه هاوضحلكم فى الأجهزة فى الجزء القادم


فا اللى ينزل يلحق نفسه و يجيب السيراميك قبل الأنتخابات البرلمانية لأن بعدها هاندخل سياسة التقفشف و الأسعار هاتعلى اكتر من كده تانى و الله أعلم المهم ندخل بقى على السيراميك
ماتتجيبيش واحد و تديله 100 جنيه علشان يمطر الشقه انتى اقفى زى الشاطرة و قسمى مساحه الشقه بعينك لمستطيلات و مربعات و مثلا لو الريسبشن مربع و داخل فيه طرقه مستطيله كده بقى مربع و مستطيل صح قيسى المربع الاول طول و عرض و أضربى الطول فى العرض هايديكى مساحه المتر المربع للمكان قسميه بقى و قيسى جزء جزء و أجمعلى المجموع الكلى للأرضيات و يبقى دى مساحه السيراميك حطى 3 متر زياده على المساحه الأصليه ده اسمه هادر يعنى اللى يتكسر فى النقل اللى يتكسر فى التركيب وزرات
ندخل بقى على الحمامات . قيسى الأرض زى الشقه طول و عرض و أضربى المساحه فى بعض
طول فى العرض هايديكى المتر المربع و أدخلى على الحيطى قيسمى حيطة حيطة عرض فى أرتفاع و هايديكى مساحه الحوائط طبعا فيه شباك و باب قيسى حجمهم و اخصميهم من المساحه الكليه اللى هاتطلعلك فى الحيطان و أعملى كده فى المطبخ و أنتى كده أخدتى مساحات شقتك بأيدك تمام طبعا ماتنسيش تجيبى المتر الزياده فى الحمام و المطبخ فى الأرضيات و الحوائط حتى لو ما أستخدمتهوش و أتبقى . حطيه فى البلكونة على جنب مش هايخسرك لأسوأ الظروف لو حصلت مشكله فى المكان و عايزه تكسرى عندك أمتار ترجعى تصلحى بيها المكان تانى

تمام دلوقتى بقى ندخل فى أزاى نعرف السيراميك الحلوة شوفى بقى أحسن أنواع السيراميك فى مصر بالترتيب ده بالظبط الجوهرة خامة سيراميك جباره أشكال خيالية أسعار

ههههههههههههههههههه غاليه مالهاش رد فعل تانى يعنى مش زى المستورد

بس هى احسن المصرى طبعا بعديها كليوباترا فى الخامة

فى الأشكال و الزوق الترتيب اللى بعده على طول رويال الصراحه جباره عاملة شوية أرضيات



دول أول 3 فى السوق , كل اللى باقى طبعا بقى بالنسبة للأمكانيات اقل فى السعر

السيراميكة الحلوة بقى تعرفيها أزاى هاتلاقى عرض السيراميكة تخين مش رفيع

سيراميكة سيراميكة يعنى

و هاتلاقى فيه حاجه اسمها عرض السيراميك اللى هو الطبقه الملونة بتاعتها هاتلاقي فيها رفيعه و فيه تخينة عليكى و على الطبقة التخينة طبعا

دى معناها سيراميك ممتازه خامة و شكل خديها مغمضة

تمام كده خلاص خلصنا من شرا السيراميك

و طريقه أختياره و الأفضل فى السوق و أماكن الشرا

طبعا ممكن تلاقى من 30 جنيه المتر لحد فوق حسب أمكانيات

خلصنا بقى من قصة الشرا

ندخل على قصه التركيب شوفى هاتلاقى من 20 ألى 22 جنيه المتر

ده سعر المحترفين اللى يركبولك السيراميك صح

شوفى بقى غلطات تركيب السيراميك

أولا الفواصل ثم الفواصل ثم الفواصل ثم الفواصل

هاتيجبى ليزر أووووووووووووووووووووعى تعملى فواصل بلغه السوق صلبان

هاتخرب الدنيا اللى يقولك فواصل عليها علشان تركيبها بيبين أخطاء تركيب السيراميك فا عايز يستسهل

لكن هايوديكى فى داهيه و هايضيع جمال السيراميك و هايخليكى ترمى فلوسك فى الأرض

هايقولك لازم الصلبان علشان التمدد قوليلى سيب حجم الوزرة من عند الحيط للسيراميك يتمدد فيها براحته ههههههههه

ده كلام مهندس مختص و الله العظيم مش كلامى أنا

و ده كلام شركة رويال لما أتصلت بيهم

الكلام ده على تركيب كل حاجه ليزر سيراميك . بورسلين . رخام

أى حاجه قطع ليزر مدام جوه البيت مايركبلهاش فواضل بره البيت علشان عوامل الجو ممكن يعمل حاجه كده زى شعرة

الخطأ التانى محدش يدوس على السيراميك و هو لسه مانشفش علشان مايبقاش طالع نازل أوعى حد يدوس عليه

وهو لسه طرى مانشفش

الخطأ التالت فواصل سيراميك المطبخ والحمام

طبعا الواحده ممنا تنزل تجيب سيراميك ينى . أسود أحمر أى لون غامق تشوفه فى العرض تقول واااااااااااو

هو ده

يركب بقى و الراجل اللى أيده تتلفف حرير يركبهولك و يحطلك فواصل بيضا تشوه اللى خلفوه ههههههههههه

تخليكى تحسى أنك دخلتى حمام تانى فا تقنعى نفسك أنه تمام اكيد هو بيبقى كده

بس حلو و الله هههههههههههههههههههه

كله ده غلط فيه حاجه ياحبايبى أسمها أكسديه دى ألوان بتتلون بيها فواصل الجبس اللعينه


علشان السيراميك مايتشوهش لما يتسقى ياخد فواصل من نفس اللون

غير كده كله تشوه و غلط فى غلط و سعره لا يذكر

التفاصيل دى بتفرق أوووووووووووووووووووووووى خلو بالكم

هاتحسو بيها بعد الأنتهاء هاتشوفو البيت زى الصور اللى بتشوفوها فى الأنترنت تمام



طيب ندخل بقى على المونة

احنا أحتاج 8 متر رمل . عربية رمل كان سعرها 180 جنيه

الصدمة بقى

سعر العماله علشان تطلع الشقه 700 جنيه
ههههههههههههههههههههه

بصو فيه ونش بيطلع الحاجه من البلكون بياخد 300 جنيه فى اليوم و يفضل معاكى طول النهار

بس انا بلكونتى مانفعش معاها ونش علشان خلفيه

و اسمنت وجبس ب 1060 جنيه يعنى مونة و مشال ب 2000 جنيه

نسيت أقولكم سعر نقل السيراميك 150 جنيه ده بالنسبة للسلاب

و ده الطبيعى زى بره يعنى

و سعر المشال العمال أخدو 500 جنيه علشان يطلعو السيراميك و احنا فى الدور الرابع

و بكده أنتهينا من قصه السيراميك

---------------------------------------------------------------------------------------------------

الدهان

 

دلوقتى بقى ندخل على الدهان خلو بالكم معلش دى كلها أساسيات طويله بس علشان تبقو عارفين كل حاجه نييجى بقى للدهان
سعر المتر من 10 ألى 12 جنيه المتر أحنا ضاغطنا عليه و أخدنا ب 10 بعد الفصال الصراحه بس من غير شغل دهانات جديده لأننا هانعمل ورق حائط بدل ألوان الكمبيوتر
هاتحسبى مساحده دهان شقتك ازاى هاتقيسى حيطة حيطة طول و عرض كل حيطه فيها دهان هاتقسيها طول و عرض و تضربى الطول فى العرض هايديكى فيها كام متر مربع و أمشى كده على الشقه كلها و على الأسقف و هايطلعلك المساحه الكليه للدهان

هايطلب حاجات من 2000 ألى 3000 جنيه حسب ألوان الكمبيوتر اللى عايزاها السعر ده 3 وشوش معجون ووشين دهان و خلو بالكم فيه ماده بتتحط بعد المعجون و قبل الدهان دى بتخلى الدهان ناشف و بتخلى الحيطه دهانها مايشققش هابقى أجيبلكم أسمها من جوزى دى غاليه بس أساس جامد للدهان
نييجى بقى للأسقف الكرانيش انتى عندك نوعن النوع البلدى ده بيعملو فى قوالب بيجب الجبس و يعملو فى قوالب و يطلع يحطو لو السقف فيه مشاكل مش مستوى النوع ده أحسن نوع بالنسبالك لو السقف تمام هاتى الجاهز المتر بيبتدى من 12 جنيه فيما فوق و التركيب المتر ب 5 جنيه البلدى كله على بعضه المتر ب 20 أو 22 جنيه على حسب الصنايعى اللى يقولك 22 فاصلى معاه و وصليها ل 20 أعملى كل حاجه و هاقولك نصيحه ماتحاوليش تضايقى بتاع الدهان و تحاولى تحسسيه أنك شاكه فيه علشا مايهدرلكيش المونه و ياريت بقى جوزك طول الوقت على أيد الصنايعيه محشد يسبهم لوحدهم علشان يخلصو بسرعه ويشتغلو بزمة طول ما فيه عين مراقبه طول الوقت عليهم كده بأذن الله تعالى خلصنا الشقه بالسباكة و الكرانيش و الدهان و تركيب السيراميك ندخل على الألمويتال

شوفى من الأخر كده بعد لف و سؤال هو3 فى السوق:

المصرى يبتدى من 250 جنيه المتر و أسمه السعدى  *

بيوصل ل 750 الجامبو المستورد   *

*  زهران ب 1000 جنيه المتر

كله خامه واحده بتفرق بس ان المستورد ألوانه أحلى من المصرى

* كده باقى الأبواب سعر الباب الاوضه فاضى خشب بس ب 300 جنيه

  دهان هايتكلف الباب 300 جنيه*

*المفاصل و الأكسسوار و الأوكرة و كل القصه دى هاتلاقيه دخل على 700 او 800 و فيه بقى جاهز ب 1000 و 

1200 بالتركيب

بالنسبة لباب الشقه أنا بفضل المصفح سعره 1900 بالتركيب
وشكله خيالى وفيه كل حاجه عين السحريه الجرس بيرش فى الأرض من كل الاتجاهات لو أتفجر مايتفتحش الحيطان تقع من حواليه و هايقف ثابت فى النص هههههههههههههه و أشكاله حلوه أووووووووووووووووى شبه الخشب تمام الخشب على فكرة أسعار فى نفس الحدود و أغلى كمان

كده الشقه أتقفلت من غير ديكورات نهائى الرد الجى كل الديكورات اللى ممكن تعمليها بأسعارها

---------------------------------------------------------------------------------------------------

الديكورات 

 ديكور الأسقف عندك الجيبسيوم بورد

ودى صورة لسقف






وده ديكور حوائط سعر الجيبسيوم بورد بقى 110 جنيه للمتر على حسب المساحه اللى عايزه تعمليها

بيتحدد السعر

هاتلاقى اللى يقولك 70 و 90 ووقت الجد هاتلاقيه زودلك معجون و تركيب ووصلها ل 110 ههههههههههه

لو هاتعملى فى حمام أو مطبخ بتجيبى مقاوم للرطوبة


ده الجيبسيوم بوورد

دلوقتى التانى بقى الديكور الحجرى

ده بيتقسم لمايكا و اسبانى و حرارى و هاشمى و الأسعار كلها ليهم كلهم بتبتدى من 100 لحد 450 جنيه المتر

على حسب اللى أنتى عايزاه

أماكن البيع

السلاب . المحجوب . النيلين . و فيه السلاب للديكور قدام السلاب مكرم عبيد الناحيه التانيه

نيجى بقى للأشكال

ده المايكا




ده الأسبانى




ده الهاشمى




ده الحرارى




كله على حسب مستورد و لا مصرى المصرى أرخص و أشكاله حلوة و الله المستورد خيالى ههههههههههههههههه

بس المصرى حلو أوى بردوه مش وحش أبدا

الفرعونى ده بطل يعنى احنا عاملينه فى بيت العايله من سنة 80 هههههههههههههههههه سيبك منه خالص ماتحطوش فى أى حسبة

ده للأوت دور زى الفل

و الحرارى ده حلو للدفايات

تابعونى لسه مع الديكورات و أسعارها

عندك ورق الحائط الرول 5 متر سعره 350 جنيه

شوفى المحل بردوه بتاع السلاب للديكور ده عنده كل حاجه تخص الديكورات

الكرانيش . الطوب . الحجر. الأبواب مصفحه و عادى . ورق حائط بكل شكل ونوع ولون . ثرى دى

كل ما تتخيليه عن الديكورات فى المحل ده و عنده كمان عماله تركبلك أى حاجه فيها

دى اشكال لورق الحائط الحديث و اللى شوفت منه هناك

عنده أشكال غريبه و عنده أوراق بألوان مجنونه مش طبيعية يعنى كل زوق و نوع موجود هناك

وده سعر الورق تقريبا و بيبتدى زى ماقولنا من 350 جنيه و الرول 5 متر مربع

ندخل على اللى بعده

خلاص كده تقريبا خلصنا الديكور لو فيه حاجه ناقصه أى واحده عايزه تعرف سعرها تكتب رد و هارد عليها

نرجع بقى للشقه كده خلصنا الديكور لسه التشطيب ما خلصش

لسه طقم الحمام و المطبخ ياحلويين

طقم الحمامات بقى

شوفى لو عايزة كابينة حمام و كده هاتلاقى أسعارها ناااااااااااااااز فى السلاب و النيلين

هى هى زيها فى فجاله و سعرها النص تمام فى الأخر كللللللللللللللللللله صينى كل اللى فى البلد صينى

ديورافيت بتركب كباين و بيبدأ سعرها من 2000 جنيه

بتقفلك بانيو قدم و حواليه أزاى و فيه دش من جوه


و عندك البانيوهات بيتدى سرعها من 600 جنيه ألى فيما فوق على حسب فايبر و لا زهر و أى نوع

و طقم الحمام كل ده هو و الخلاطات على حسب أمكانياتك

هاتيه

و خلى بالك علشان السباك بيركب الحاجات دى بتكوت من ضمن فلوس التشطيب

و الكهربائى كمان هو اللى بيركبلك النجف ووشوش الكهربا

فا أوعى تدعى لصنايعى فلوسه كامله حتى لو قدامك شهر تخلصى علشان يركب ده

ماياخدش فلوسه ألا لما يخلص تشطيب معاكى السباك و الكهربائى أول ناس بتخش الشقه و اخر ناس بتخرج

وماتنسيش أكسسوارات الحمام

حامل الفوطة و الصبانه و المرايا و كل التفاصيل دهو اوهى تنسى تخلى الكهربائى يعملك فيشه أستخدام فى الحمام علشان لو هاتعملى سشوار و لا بيبى ليس بعد الدش و لا حاجه و أضاءه فوق مرايه الحمام التفاصيل الصغيره دى اوعى تنسيها

المطبخ

 شوفى حسب الخشب

أرو

زان

كونتر

دول أحسن تلاتى فى السوق و ده ترتيبهم رقم 1 الأرو

و بعده الزان و بعده الكونتر

سعر متر الأرو بيبدأ من 1600

و الزان فيه ناس بتعمله ب 1100

لكن هو سعره بيبدأ من 1300

و الكونتر ب 1100

دى الأسعار بالأكسسوارات يعنى بالأستانلس و الحاجت السحريه اللى جوه المطبخ

الخشمونيوم و الألمونيوم بيبدأ من 900 ده ارخص حاجه

بس ده الخشب لا يعلى عليه

انا جيبت ناس بعد بعث كبير من المعادى

خدو منى فى متر الكونتر متغطى بقشره ارو ب 1300

و جم عاينو و عملو تصميم ثرى دى و رسم أولى بدون مقابل

ناس أخلاق الصراحه

شوفى بقى لو مطبخك صغير و عايزه توسعى اتجرأى و افتحيه ماتخافيش

انا عملت كده أدى وسع للريسبشن و كمان المطبخ ماتقفيش فيه مخنوءة و الدنيا ونس و جميله

دى اشكال أنا فتحته خالص على الريسبشن كده تمام








أفتحى وأتجننى ووسعى ماتخافيش

شكلها هايطلع حلو أختارى بزوقك و أتجراى ماتخافيش